रामेछाप । आर्थिक वर्ष २०८२/०८३ मा सम्पादित स्वास्थ्य कार्यक्रमको जिल्ला स्तरीय वार्षिक समीक्षा गोष्ठीबाट रामेछापका आठ स्थानीय तहका स्वास्थ्य शाखामध्ये उमाकुण्ड गाउँपालिका प्रथम, मन्थली नगरपालिका द्वितीय र रामेछाप नगरपालिका तृतीय भएका छन्।
मन्थली नगरपालिकाको सभाहलमा मङ्गलबार र बुधबार संचालित दुई दिने गोष्ठीमा स्थानीय तहका स्वास्थ्य कार्यक्रम, सेवा प्रवाह, कार्यक्रम कार्यान्वयन तथा उपलब्धिका आधारमा गरिएको मूल्याङ्कनको नतिजा सार्वजनिक गरिएको हो।
कार्यक्रममा बागमती प्रदेश सरकार स्वस्थ्य तथा सामाजिक विकास मन्त्रालयका प्रशासक सतिश विष्टको प्रमुख आतिथ्यता तथा जनस्वास्थ्य कार्यालय रामेछापका प्रमुख विवुकुमार झाको अध्यक्षता रहेको थियो।
गोष्ठीमा दोलखा र सिन्धुली जिल्लाका जनस्वास्थ्य प्रमुख, रामेछाप जिल्ला स्वास्थ्य कार्यालयका प्रमुख डा. सागर जर्घा मगर, जिल्लाका आठवटै स्थानीय तहका स्वास्थ्य शाखा प्रमुख, स्वास्थ्यकर्मी तथा पत्रकारलगायतको उपस्थिति रहेको थियो।
कार्यक्रममा आर्थिक वर्ष २०८२/०८३ मा सञ्चालन गरिएका स्वास्थ्य कार्यक्रमको प्रगति, उपलब्धि, समस्या तथा चुनौतीका विषयमा समीक्षा गरिएको थियो। साथै आगामी वर्ष स्वास्थ्य सेवा प्रवाहलाई थप प्रभावकारी बनाउने विषयमा समेत छलफल गरिएको थियो।
