रामेछाप । गत फागुन २१ गते सम्पन्न प्रतिनिधिसभा निर्वाचनमा उल्लेखनीय सफलता हासिल गरेको राष्ट्रिय स्वतन्त्र पार्टी (रास्वपा) ले रामेछापमा संगठन विस्तारलाई तीव्रता दिएको छ। प्रतिनिधिसभा निर्वाचन क्षेत्र नम्बर १ मात्रै रहेको रामेछापमा नेकपा एमाले, नेपाली काँग्रेस र अन्य दलका उम्मेदवारलाई पराजित गर्दै रास्वपाका डा. कृष्णहरि बुढाथोकी सांसदमा निर्वाचित भएका थिए। उनी हाल संघीय संसद्को अर्थ समितिको सभापति समेत रहेका छन्।
२ नगरपालिका र ६ गाउँपालिका गरी ६४ वडा रहेको जिल्लामा रास्वपाले वडा तहदेखि संगठन विस्तार अभियान अघि बढाएको छ। पार्टीले हाल धमाधम वडा अधिवेशन गर्दै स्थानीय संरचना सुदृढ पारिरहेको जनाएको छ।
रास्वपा रामेछापका उपसभापति मोहन कार्कीका अनुसार प्रतिनिधिसभा निर्वाचनसम्म जिल्लाका २५ वडामा मात्र अधिवेशन भएको थियो। “केन्द्रले जेठ १० गतेभित्र सबै वडा अधिवेशन सम्पन्न गर्न निर्देशन दिएको छ,” उनले भने, “सोहीअनुसार अहिले २८ वडामा अधिवेशनमार्फत नयाँ नेतृत्व चयन भइसकेको छ।”
उनका अनुसार गोकुलगंगा र उमाकुण्ड गाउँपालिकामा सबै वडा अधिवेशन सम्पन्न भइसकेका छन् भने पालिका अधिवेशन पनि सकिएको छ।
लिखुतामाकोशी गाउँपालिकामा वडा अधिवेशन सकिएर पालिका अधिवेशनको तयारी भइरहेको छ। अन्य पालिकामा भने धमाधम वडा अधिवेशन भइरहेका छन्।
जेठ अन्तिमसम्म सबै वडा र पालिका अधिवेशन सम्पन्न गर्ने लक्ष्यसहित पार्टीले सक्रियता बढाएको कार्कीले बताए। रास्वपा रामेछापका अनुसार हाल जिल्लामा करिब ७ हजार सदस्य रहेका छन्। वडा अधिवेशनका सांसद बुढाथोकी, जिल्ला सभापति रमेश रायमाझी सहितका जिल्ला पदाधिकारीहरु सहभागी भइरहेका छन्।
संगठन विस्तारलाई तीव्रता दिँदै आगामी दिनमा स्थानीय तहसम्म आफ्नो प्रभाव विस्तार गर्ने लक्ष्य अनुरूप पार्टीले काम गरिरहेको उपसभापति कार्कीले बताए ।